1Th 2 | BEF | STEP | Lalalutigita, lenalitoga buto minoto lu'ohuta ya'ma fa'menena lolo mehibe lite lenalitini keheli'ahabe.

1 Thessalonians 2

Polu Tesalonika metoga mono foya li'ehina

1 Lalalutigita, lenalitoga buto minoto lu'ohuta ya'ma fa'menena lolo mehibe lite lenalitini keheli'ahabe. 2 To Filipai hepatoga lele'mo sibina to huli ka lu limite hilata hi'ahago yalo lenali Tesalonika bona'magita bu'ohuta akeheli'ahabe. Ya hi'ahanaya to bona'i luga'amagihi luba limilune'mu nehago Hu'mau lukesa fi hetofa hu leto'ehigo babahi huto nohuto lenalitoga Hu'mamofihi ka lamana'a lu huto huto lu lepi'ohuta. 3 Lenegekesa lito lu lepilata nohuta yamofihi keheli sibi saba hite foipa foya'mu kehelito lu sibina sabana huto lenimi'i moloto lu melepi'ohune. 4 Hu'mau bu logoto laga besigo ya'ma hetofa kaga'ni keheli fotogo hu'ohuto lu lepilabe luto lele'mo eto hulago ya'ma ana ka nolune. Bona'i luga'amagi kehelite linogo bati hilibe luto meni'ibe. Hu'mau ai komopatigu bu go fulu tise bouba keheli'ehinogo lamana hilibe luto nolune. 5 Lenali ya'ma lali hapati keheli'ahabe. Lali ya'ma lenalitoga mino moloto suguna huto efaha fe'no kumu buka tiluna'mu lenofokehi lilata ka lenugufa lelito tilabe luto lu melepune. Hu'mau keheli'ehigo nolune. 6 Lenalifi to noto noto bona'ifi lali kumu kehelinogo tinogo lenikibina bo lolo hilabe luto melune. 7 Lali Kilisitohi aposolo'a nohutagi ya'ma ana'ina mone kumu linogo limilina bati hilina ya huto meni'ibe. To a'i moneuba yagapana'a laga hina'a hulata kaba nohina suhi huto lali ya'ma lenalitoga minoto lenele'mo bati hulata nohune. 8 Ya huto laga hinana'auba komopatini lenalitoga minolago Hu'mamofihi ka lamana'a lu lepilune luto mino'ohune. To ya'masigoko meni'ibe. Lali lenalitoga komopati ni'igo lenali kumu bati huto filitita'mu yabe. 9 Lalalutigita, naga ito li hetofa huto nohutogo lenali kosele'i lenoho laligi luto utehi foya'a amuya moloto to babu luto lito nohuto Hu'mamofihi ka lamana'a lu lepi'ohuta'a akeheli'ahabe.

10 Lali komopati fana tago minoto bati huto foipanati meni'igo lamana huto lenalitoga bula ola huto mino'ohuta lenali hiti to Hu'ma hiti hapati keheli'ahabe. 11 To bo moneuba yagapana'a bati huto kaba hu'ehina suhi huto lali lenalitoga lenele'mo eto eto huto mino'ohutamo akeheli'ahabe. 12 Ya huloto lenegekesa lito lenele'mo amuya moloto huto lu lepolo'ohutamo ni'ibe. To Hu'mau ai kapogu lenele'malina bouba to fana meha'a lepilina bouba bu goto lenofokehi lilibe lite laga hina hite minalo, luto lu lepiba lepiba hu'ohuta ni'ibe.

13 To lali Hu'mamofihi kaga lu lepi'ohutogo lenali ya'ma bona'magihi kaga ni'ibe lite melise ya'ma Hu'mamofihi ka lamana'a yabe lite kehelite li gu i'ahanamo ni'ibe. To lamana'a ya'ma huto ni'ibe. Hu'mau ya'ma aitoga keheli emilata bona folagaha'anigu minoto foya'a lilata nohibe. Ya'mu lenalitoga ya huto nominana'mu lali ya'ma Hu'mamofihi fokehi mone hiti holoto nominone. 14 Lalalutigita, Hu'mamofihi yagapana'a Yuta melugu Yesu Kilisitotoga bite i ke'me'ahana enali hiti lenali hiti moneko'i lolo hite nehabe. Enalitoga huto hu'ehina suhi ana huto lenalitoga huto hu'ehina yabe. Enali bona'animagi enele'mo sibina hi'ahana ni'igo to ana hite lenali bonatini luga'amagi kalana'i mele lepelete ya hi'ahana yabe. 15 Yuta bona'i enali Sipi Bo Yesuhi he'ahana to Hu'mamofihi ka'a lu yege hose bona'i hiti enehe fili'ahana to lali'i legene mane ite lehete li he'mi'ahana. Enali kumu Hu'mau keheligo ipa'a sibina nohina yabe. To enali bona'i asagatoga luba sabo hilata nehana yabe. 16 Ya nehite lali fegutoga bona'i ka lamana'a lu yege hoto lu epinogo enubuto bi lalabe lite ya'ma Yuta bona'magi kapo fi hekini lalutagi lite luba ka lu limilata hi'ahana. Enali ya hiba hiba hago enali foipanamofihi gupilo melenogo kolo kolo huto tito minago yatai Hu'mamofihi ita bigo ya nasanamofihi luba'a mone enalitoga neheti'ehina yabe.

Polu Tesalonika metoga aku'i bilube luto lu'ehina

17 Lalalutigita, lali'i kana nesi'agu foto'i mino'ohuta yamofihi komopatiguti meni'ibe. Fa'mene lugufatu lolo hu'ohuta ni'ibe. Lenali kumu legekesa yigiba yigiba huto minalune luto lenali'i bu lenagalupihe luto amuya moloto minolata hune. 18 Ya huto buto bu lenagalune luto lu'ohutaya to Poluita nani'ni babu yupahi buto bu lenagalube luto lu'ohunaya ni'igo aku Satau ya'ma kapo fi hekini lo neto'ehibe. 19 Lenali kumu yabe luto laga'a kehelilata nohune. Yamofihi ma huto ni'ibe. Sipi Boti Yesu oto nehetilina yupahi ya'ma gobisalo hiya bona'magi lali foyatimofihi legeya'a lolo hilabe? Lenalitinigo ya'ma lali foyamofihi legeya'a lolo hilune'mu habe. Ya'ma huto hilina yupahi lali sa huto geba nohune. Ya nehinogo lenali kumu legelo bito minalune. 20 Lama'naka, lenali kumu lofokehi holata nohuta to komopatigu keheli bati hulata nohuta yabe.